পথত ৰাম কৃষ্ণ মহাভাগ৷

যাহন্তে ধোবাক পাইলন্ত লাগ৷৷

খুজিলন্ত বস্ত্ৰ মাতি ধোবাক৷

দিয়ো ভাল বাছি বস্ত্ৰ আমাক৷৷১১২৪৷৷

আজি যেৱে বস্ত্ৰ কৰস দান৷

হৈবেক পৰম তোৰ কল্যাণ৷৷

এহি বুলি বস্ত্ৰ খোজন্ত হৰি৷

দুৰ্ম্মুখ ধোবা মাতে ক্রোধ কৰি৷৷১১২৫৷৷

কিনো মহামূঢ় তোৰা গোৱাল৷

পৰ্ব্বত বনত খপস কাল৷৷

মৰিবাক লাগি নাহিকে ত্ৰাস৷

ৰাজাৰ বস্ত্ৰক পিন্ধিবে চাস৷৷১১২৬৷৷

প্ৰাণ লৈয়া পলা ঐৰ অন্তৰি৷

ৰাজদূতে পাইলে দণ্ডিবে ধৰি৷৷

দৈৱকীসুতে শুনি হেন বাণী৷

মাৰিলা ধোবাক চৱৰ টানি৷৷১১২৭৷৷

ছিণ্ডিল মুণ্ড চৱৰতে তাৰ৷

যতেক ধোবা লগৰীয়া আৰ৷৷

বস্ত্ৰ পেলাই সৱে দিলে লৱৰ৷

দেখিয়া কৃষ্ণ ৰঙ্গ ভৈলা বৰ৷৷১১২৮৷৷

ভাল বাছি বস্ত্ৰ লৈল দুভাই৷

গোৱালসৱক দিলা পেলাই৷৷

বেশকাৰে আসি পিন্ধাই বস্ত্ৰক৷

কছাইল ৰঙ্গে ৰাম মাধৱক৷৷১১২৯৷৷

তাত তুষ্ট ভৈলা কৃষ্ণ অধিক৷

দিলন্ত পৰম ঐশ্বৰ্য্য শ্ৰীক৷৷

সাৰূপ্য মুকুতিকো দিলা তাক৷

বুলিলা অনেক আশ্বাস বাক৷৷১১৩০৷৷

সুদামা নামে মালাকাৰ আছে৷

তাহাৰ বাৰীত পশিলা পাছে৷৷

দূৰতে দেখে আসে কৃষ্ণ ৰাম৷

কৰিলা সুদামা পৰি প্ৰণাম৷৷১১৩১৷৷

আসন আনি দিল আথেবেথে৷

বসিলা তাত ৰঙ্গে জগন্নাথে৷৷

                                              পাদ্য-অৰ্ঘ্য-গন্ধ-ধূপ লগাই৷

কৰিলা পূজা লৈল দুয়ো ভাই৷৷১১৩২৷৷

ভূমিত পৰি বোলে মালাকাৰ৷

পিতৃ দেৱ ঋষি তুষ্ট আমাৰ৷৷

আজিসে জন্ম সাফলিলো আমি৷

কুলকো পৱিত্ৰ কৰিলা স্বামী ৷৷১১৩৩৷৷

জগতৰে মোক্ষ কাৰণ হুই৷

ভৈলা অৱতাৰ তোমাৰা দুই৷৷

ভকতজনৰ ৰক্ষাৰ হেতু৷

দুষ্টক নাশাহা গৰুড়কেতু৷৷১১৩৪৷৷

জগতৰে আত্মা ঈশ্বৰ দেৱ৷

তোমাৰ শত্ৰু মিত্ৰ নাহি কেৱ৷৷

সমস্ত ভূততে আছা বিয়াপি৷

ভজন্তাক প্ৰভু ভজা তথাপি৷৷১১৩৫৷৷

কৰিয়ো আজ্ঞা আমি তযু ভৃত্য৷

তোমাৰ দুইৰো কৰো কিবা কৃত্য৷৷

যাক পাঞ্চা তুমি কাৰ্য্যক লাগি৷

প্ৰসাদ পাইবে সেহি মহাভাগী৷৷১১৩৬৷৷

এহি বুলি বুজি কৃষ্ণ ইঙ্গিত৷

আনিয়া সুগন্ধি পুষ্পে ৰচিত৷৷

পিন্ধাইল দুইকো অঙ্গে মুঞ্জমালা৷

পুষ্পে ভূষিলেক যত গোৱালা৷৷১১৩৭৷৷

ভকতি দেখি তাৰ কৃষ্ণ ৰাম৷

বোলন্ত লৈয়োক বৰ সুদাম৷৷

শুনিয়া মালী বোলে যুৰি হাত৷

থাকোক অচলা ভক্তি তোমাত৷৷১১৩৮৷৷

বিষ্ণু ভকতেসে হৈবে বান্ধৱ৷

ভূত দায়া জোনো ছাড়ো মাধৱ৷৷

এহি বুলি মৌন ভৈলা সুদাম৷

দিলন্ত বৰ সৱে কৃষ্ণ ৰাম৷৷১১৩৯৷৷

বুলিলা আৰো তাৰ ভক্তি দেখি৷

নেৰোক তোমাক অচলা লক্ষ্মী৷৷

বল আয়ু যশ দিলো সমৃদ্ধি৷

সৰ্ব্বকালে হৌক বংশৰ বৃদ্ধি৷৷১১৪০৷৷

সুদামাক দিয়া এতেক বৰ৷

বজাইল তৈৰ ৰাম দামোদৰ৷৷

আনন্দে বেঢ়ি যায় গোপগণে৷

হৰি হৰি বোলা সমস্ত জনে৷৷১১৪১৷৷